原创 海上梦叠 海上梦叠
方言传承靠后生
作者：（海上梦叠）丁迪蒙
朗读：沉默是金
由于学堂要求，上海个学生无论学堂、社会、家庭、一般侪讲普通话。而交关家长也顺势用并勿标准个普通话搭小囡交流。多少年数来，已经成为了风气。我个囡儿也是搿能。
作者的母亲
不过，因为外婆是浦东人，年纪大了，勿愿意随大流。因此，阿拉屋里始终是沪语撑市面个。沪语本来就邪气风趣、幽默，再加上老人还经常会得冒出一两句“轰（风）大来邪！”或者学讲几句宁波闲话：“害鸡茨菇肉（咸菜自家揉），缺哪（吃呀），冒（别）客气”之类个搞笑内容，常庄拿囡儿引得捧牢仔肚皮穷笑八笑。久而久之，囡儿逐渐接受了吴语个最初浸润搭仔熏陶。
小学三年级个辰光，我突然之间发现伊已经长远勿讲上海闲话了。问伊，还邪气有道理：“我喜欢。你是测试员，为何不让我说？普通话上台面，侬晓得伐？” 伊勒讲搿句“普通话”个辰光，居然还拿“上台面”后头个词侪切换成功沪语了。哈哈！伊也晓得搿种比喻，只有用沪语讲再更加准确、形象、“煞根”呀！
对伊个表现，我邪气担忧。方言是语言历史个活化石，其中勒多少现代语言当中失传个语音、词语、语法个原始信息啊！即使是北方闲话，也是由多种北方方言组成个。赵本山个小品假使用普通话，葛台词里向介许多双关个幽默、谐音个俏皮、联句个抑扬、俚语个机智，恐怕也就会得荡然无存了。
为了让伊勒屋里讲沪语，我略施小计：问题假使是用普通话问个，一概充耳不闻。伊只好用沪语了。虽然有得拨伊讲得怪腔怪调、让人笑煞个专门词语，但一律先肯定、再去纠正。搿能过了两年，伊个沪语有模有样了。而且发音一眼也呒没现在年轻人讲沪语辰光个让人哭笑勿得个语音语调。伊年伊去参加普通话水平测试，成绩稳居一级。由此可见，勒屋里讲方言，并勿影响伊个普通话水平。
囡儿学酒店管理，有趟伊值班处理客人投诉，听客人个普通话当中带勒吴语音，就直接改用沪语交流。几分钟以后，又听出了对方沪语当中个本地口音。就索介用浦东闲话攀起同乡来，投诉当然也就不了了之了。
作者及其女儿
俗话讲“亲不亲，故乡人”。是个呀！勿管勒外国、外地，故乡个人侪是用“乡音”来牵线搭桥个。现在个伊，搭西方人讲英文，搭北方人讲普通话，搭上海人讲沪语。真个是“‘方言交流’通四海”啊！
我写《上海方言词语使用手册》，伊主动承接前期工作，整理词条，按音序输入电脑，还写了勿少例句。另外，参与我个公益讲座、搭我整理沪语文章、朗读，还为我建立公众平台《海上梦叠》，几乎成了维护方言地位个中坚。
我想，假使每个家庭侪让小囡就搿能毫勿费力、自然而然个承继搿份海派文化遗产，沪语哪能可能失传呢？
朗读者：沉默是金
原标题：《方言传承靠后生》
阅读原文
